L servije de orientament e mediazion de familia del Comun General de Fascia é atif dal scomenz del 2025 con la gestion de ALFID.
Do l trat de temp de colaborazion con la Coprativa Le Rais, col 2025 l Servije sozio-assistenzièl del Comun General de Fascia ge à dat su a ALFID (Sociazion Laica Families en dificoltà) de Trent la gestion de n Portel de scout, orientament e mediazion de familia out, zenza paament, a duta la persones de la val che sent l besegn de n aiut per ge fèr front miec che les pel a la fadies de duc i dis, con l obietif de stèr miec tant dal pont de veduda personal che de relazions. Te chest temp l portel à tout dant desvaliva situazions, en dut l é stat fat 73 scontrèdes con persones singoles e 9 con cobies (per i percorsc de mediazion familiara). N muie i argomenc traté, anter chisc soraldut l esser genitores, l’assistenza a chi de cèsa
e l orientament ai servijes sul teritorie. L lurier prezious del Portel l é stat recognosciù ence da la medema persones che se n à emprevalù col responer al chestionèr che ge é stat manà olache les à metù al luster la desponibilità e la profescionalità di operatores. L Portel à lurà ence en colaborazion con i servijes del teritorie che ge à segnalà e ge à manà jent che à podù se miorèr de chesta strutura travers n confront avert con operatores che pel dèr n aiut o indicazions per se oujer ai servijes spezialistics de referiment.
Per aer n aputament se pel chiamèr l numer de fonin 375 8366271 (o l numer ALFID onlus 0461 235008) dal lunesc al vender da les 8:30 a les 12:00 e da les 14:00 a les 18:00 opura se pel scriver a
sportellocgf@alfid.it.
La scontrèdes vegn fates ló da la ex Caserma Piave, olache l é l Anffas e l Laboratorie Sozièl, te strèda di Pre de Lejia 12 a Sèn Jan.
Podede lejer dut su La Usc dai 27 de mèrz da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)
(CT)
