La Usc di Ladins

Mistere dla vita – Soul Motion
Le Consëi de formaziun Badia mët a jí na sëra de bal cun Soul Motion, sciöche preparaziun y meditaziun por Pasca. En mertesc al 31 de merz dales 19:30, tla Ciasa J. B. Rinna a San Ciascian
É la vita n stomat che i messun desgropé? O n mistere che i ne messun nia capí mo madër vire? Co se sënta pa ite chësta tematica te to corp y te to fle? Ci respostes te scinca pa le chît y ciünes pa le bal?
Chësc pón descurí pro la sëra de bal cun Soul Motion, che vëgn metüda a jí en mer­tesc al 31 de merz dales 19:30, tla Ciasa J. B. Rinna a San Cia­scian. Referënta é Elsa Pescoll­derungg. Les iscriziuns vëgn tutes sö pro Margit al 340 3438709. Organisaziun: Consëi de for­maziun Badia.

L’orchestra »Monteverdi« a La Ila
L’orchestra dl conservatore »C. Monteverdi« da Balsan tëgn conzert ai 29 de merz, te Ciasa dla Cultura a La Ila
En domënia ai 29 de merz dales 20:00 sarál da aldí tla Ciasa dla Cultura a La Ila l’orchestra dl Con­servatore »C. Monteverdi« da Balsan.
L’orchestra, metüda adöm da passa 80 musizisć jogn dl con­ser­vatore, portará dant le con­zert por clavier y or­chestra op.16 de E. Grieg y la suite sinfonica »Šehere­zade« de N. Rimsky-Korsakov. Te chësta ocajiun gnarál ince soné l’opera »Motor road 2« dl componist Eduard Demetz.

Batadú te Ciasa de palsa
Ai 10 d’aurí vëgnel carté te ciasa de palsa, pro le batadú davert a düc
La Uniun di Seniors da San Martin de Tor adöm ala Ciasa de Palsa Ojöp Freinademetz mët a jí n batadú davert a düc, te Ciasa de Palsa a San Martin, en vën­dres ai 10 d’aurí dales 14:00 inant.
I pers pó se scrí ite al numer de telefon 0474 524700, anter i 9 d’aurí. Le cost dl’iscriziun é de 20,00€ a porsona, che é da paié ite sön le post.
Düc é bel inviá y al s’aspeta de bi pesć.