La Usc di Ladins

Scutèr e se confrontèr coi teritories per na reorganisazion de la sanità e per arvejinèr i servijes a la popolazions. L é un argomenc traté endèna la scontrèda del Consei de la Sanità de Fascia e Fiem che se à binà en mèrtesc ai 31 de mé te Cèsa de Comun de Pardac. A chest enconter à tout pèrt ence l’assessora a la sanità de la Provinzia de Trent Stefania Segnana e l diretor del servije ospedalier provinzièl Pier Paolo Benetollo, envié dal comissarie de la Comunità de Fiem Giovanni Zanon e dal procurador del Comun General de Fascia Giuseppe Detomas.

L é stat n moment emportant ajache l é stat prejentà la neva dirigenta de l’Apss de Fascia, Fiem e Cembra, Stefania Aloisi, che tol l post de Luca Nardelli se n jit de jugn del an passà.

Un di problemes maores che l é stat uzà fora l é la mencianza de profescionisć. L’assessora Segnana à spiegà che la situazion la é belebon senestra no demò tel Trentin, ma te dut l Paisc.
»L’Azienda sanitèra seghitarà a lurèr su l’atratività e la trategnuda di profescionisć – à amò dit Segnana – ge sporjan la mior condizions de svilup profescionèl, de benesser, de endrez e de calità de vita. Per chest, i bandi de selezion vegn mané ence fora de provinzia duran i media inovatives.«

L ospedèl de Ciavaleis, l é stat recordà, raprejenta na ezelenza per l’ortopedia e inant de la fin del an vegnarà formalisà ence sie ruol zentrèl per i intervenc chirurgics ai muscoi de sostegn de la pèrt bassa del ciadin tras la sinergia anter la unitèdes operatives de urologia, ginecologia e chirurgia generèla.

»Chesta Aministrazion provinzièla, en sinergia strenta con l’Apss, enten coscita arvejinèr i servijes teritorièi e di ospedèi ai sentadins, per garantir che duc posse apede a la cures« à dit amò Segnana.

Te la scontrèda i raprejentanc istituzionèi à metù al luster l ruol emportant di teritories per la reorganisazion de l’Azienda sanitèra, col ge dèr emportanza al ospedèl de Ciavaleis e a la Cèses de la sanità.

De più su La Usc stampèda de en vender ai 10 de jugn del 2022.


 (MCI)