La Usc di Ladins

Per egn »mia majon« l é stat la cèsa de Reinhold Cigolla e Tiziana Dellantonio, rechiesc. Anchecondì, enceben che l defora e l daite i abie la medema parbuda, sia filosofia é mudèda. L é scì amò n post artistich lo che se pel mirèr dalbon na zopa de operes del artist, ma l conzet de acolienza se à svilupà con n fon pensier etich. I spazies é fornii con fiores e piantes da la man ascorta de Nadia, Gaia rencura prateghes naturèles e la prenotazions di ghesć, Marti valorisea l’ospitalità e la strutura con sia creatività. 
Na squadra prest deldut al feminin, sessaben col didament de Igor. La strutura la sporc n disnèr vegetarian (su domana ence vegan), la é ascorta a la mobilità e a la comunanza LGBTQIA+, a l’ativitèdes da fèr te Val. Segur n projet de acolienza inovatif. 
Ma él dalbon coscita sorì l portèr inant? Na tèl strutura, co fèjela pa a se fèr ite te la perferida turistica de nosc raion?
Se aon fat na ciacolèda con Gaia Cigolla, con vèlch intervent ite per anter de sia mère Nadia, per descorir tras sia ousc chest projet e sotrisson dantfora che les à piajer de ge l fèr cognoscer mascima a chi che no lo cognosc.

Él possibol esser na strutura sostegnibola del 2024 a Cianacei?
Gaia Cigolla La é dura, prum de dut percheche se se sent belebon soi. No l é na rei de jent che la peissa desche tu. E più che sostegnibola, ence vedù che la perfezion no la é, ne sà bel dir che sion na strutura etica, con n pensier etich tedò nosc servije. E no sion perfec: demò a rejonèr de energia, respet a na cèsa clima e l’inovazion, sion en do: l é na cèsa veia e con si elemenc che no va, ma ence na cèsa artistica e storica del giaf Reinhold e de la giava Tiziana. Nos vardon de aer n pensier sun chel che proon a dèr.

De più su La Usc stampèda de en vender ai 7 de jugn.  (Nicoletta Riz)