La Usc di Ladins

Per i sonadores di trei comuns de Cianacei, Ciampedel e Mazin, do che da n bon trat i se enjigna, l ora de moscèr i ejic de sia atività. Te chisc meisc passé i à fat n muie de proes, ma i à ence dat sie contribut a la comunanza, tolan pèrt a la festes metudes a jir ai 30 de mèrz per i 200 egn de la gejia de Ciampestrin e dapò ai 3 e ai 11 de mé per la sègres de Sèn Florian a Cianacei e di Sènc Felip e Giacum a Ciampedel.
Da no desmentièr l lurier emportant che vegn portà inant ensema con la Scola de Musega Il Pentagramma col sostegn de la Federazion de la bandes del Trentin, per arvejinèr i bec a la musega ge fajan cognoscer e aprijièr i strumenc.
Ades l é stat avert la enscinuazions per i neves arlieves: chi che vel se enjignèr per dapò jir a sonèr te la banda i pel tachèr jà da canche i à 8 egn, tant i neves arlieves che chi che vel jir inant col percors jà envià via i pel se scriver ite fin ai 22 de jugn.
Ma l prum apuntament emportant sun usc e l é chel per l tradizionèl ‘Conzert d’Aisciuda’. Do aer podù veder e aprijièr sun paladina i sonadores de la Museghes de Moena, Vich e Poza, en domenia prum de jugn da les 20.45 i fascegn arà l met de scutèr ence la Mùsega Auta Fascia tel PalaDolomites de Ciampestrin.

Se pel lejer dut su La Usc nr nr 20 dai 30 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (LG)