La Usc di Ladins

Y avisa chël ne n'ie nia unì fat. Danter vel' descuscion y l'autra ne n'iesen nia stac boni de mëter su la Jonta nueva dl Chemun de Urtijëi. La ulentà de cunlauré à tramedoi, o dijon mé, tramedoi ulëssa lauré per Urtijëi. Danter la Lista Unica y la SVP fòvel mpue de tenscions, ma mpo descuscions da maniera.

Da pert dl ambolt Tobia Moroder iel unì purtà la pruposta de ti dé na lerch te Jonta dla Cumenanza raiunela a Ewald Moroder; na pruposta che ti ie al SVP unida dit "massa al ultim mumënt y na pruposta de puecia garanzia". La SVP se à nscila damandà de mëter su mpo mo la Jonta de Chemun cun la prupostes di candidac che ëi à fat: Ewald Moroder, Armin Lardschneider y Lara Moroder. Te n segondo mumënt, sce Ewald Moroder ëssa giapà la lerch pra la Cumenanza raiunela, pona ëssen, aldò dla pruposta dla SVP, metù su na Jonta de Chemun nueva, zënza Ewald Moroder. La Lista Unica à sun chëla respundù, che n ne uele nia mëter su na Jonta y la mudé inò te n mëns. Nsciuma, nce tlo ne n'iesen nia a una.

Daldò à l prim zitadin de Urtijëi mo purtà dant la pruposta dla Jonta nueva: per la Lista Unica ël, Martina Comploi y Janpiere Prugger - per la SVP Hannes Senoner, Lara Moroder y Armin Lardschneider. A votazion àn lità chi che ie per chësta pruposta y chi de contra. Duc i cunselieres dla Lista Unica fova per, duc dl SVP contra. Deguna maiuranza arjonta.

Cie uel pa chësc dì? Do n'ëura de senteda àn spënt l pont, y nscila la senteda, a merdi dl'ena che vën. A udëi sce n ie boni de s'la fé ora iló - ajache - almanco aldò de cie che n à dit pra la senteda - ne n'uel no la Zivica y no l SVP che l messëssa unì n cumiser per l luech.

La Usc repurterà.