Ence chest an ai 26 de jugn l é stat festa grana a Moena: en pruma fila ti momenc ofiziai i sonadores de la Banda, i preves e sun duc don Walter Sommavilla, l’autoritèdes e i gropes de socors e folclor.
Sèn Vile a Moena vel semper dir prum de dut musega, en particolèr chela di sonadores de la Banda del paisc, che duc i egn l dì de la sègra i ge fèsc da beicher a sentadins e ghesć. Coscita la é stata ence chest an ai 26 de jugn, e do aer descedà l paisc la Musega de Moena l'à fat la pruma defilèda da Piaz de Ramon fin a la gejia del Sènt patron. Chiò da les 10 l é stat dit messa grana, con letures, Vangele e de bela orazions per ladin. Ence gran pèrt de la bela cianties del Cor de gejia che à enterzà la zelebrazion les era per moenat, del componist Luigi Canori.
La sègra de Sèn Vile a Moena l é semper la ocajion per envièr i preves del paisc che arjonc n cedean toron da sia ordenazion religiousa e ge fèr festa.
Chest an l onor maor ge pervegnia a don Elio Sommavilla, con ben 70 egn da preve. Don Elio, che do na vita en miscion ades l é a Trent, no l à ampò podù ruèr a Moena per rejons de età: de oril l à compì 97 egn. A el ge é jit i augures de la comunanza. No l à podù ruèr te sie paisc, ma per via de si empegnes religiousc, nience l preve più joen, don Mattia Vanzo, 35 egn de età e 10 da la ordenazion religiousa. A vidèr la zelebrazion l é stat don Walter Sommavilla, festejà per 30 egn de sacerdozie, e apede el sun utèr don Gianni Damolin, don Bruno Daprà e don Devis Bamhakl, ence el ruà al prum picol cedean de 5 egn.
Apede a chest, ence chest an la sègra de Sèn Vile l é stat la ocajion, a la fin de la messa, per benedir n nef meso di Studafech de Moena. Chest’outa don Gianni Damolin l à benedì n furgon polisocors.
Se pel lejer dut su La Usc nr 25 dai 4 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper. (Lucia Gross)
