La Usc di Ladins

Al é de chi che l’arata na novité storica, chësta lege deliberada por ultim gre dal Senat a Roma. Dal 1. de messé 2025 inant vëgnel ince tla Talia (dlungia a d’atri Paisc) sconé le tier de vigni vers. Degun tier ne dess plü gní taché pro ma morona o pro na corda.

Da sëgn inant é le tier sconé dala lege, al á sü dërc, sce le/la patrun/la patrona ó o nia, le tier mëss gní traté cun respet y dediziun. Cina sëgn se limitâ la lege a sconé le “sentimënt dles porsones” por i tiers. Sëgn, indere, devënta la sconanza di tiers iuridica, ajache i dërc di tiers vëgn reconesciüs a na manira independënta. Chësta mudaziun comporta na evoluziun culturala sota por döta la jënt.

En caje de maltratamënc o soportanza de condiziuns danoses y prigoroses dl tier (o cian o iat o vacia…) risćëia le malfatur dai 6 mëisc ai 2 agn de porjun.

Lapró vëgnel proibí sön döt le teritore nazional l'adoranza dla morona por i cians o cordes aratades de chësta sort: ara ne vá nia plü da tigní i cians tacá te na manira duratura, reconescion so dërt a na vita dignitosa y lëdia da soferënzes. Chi che ne respetëia nia chësta regola, risćëia na multa danter i 500,00 y i 5.000,00 Euro. Ince chëstes mosöres toma ite te n implant normatif che mët al zënter dla atenziun publica le bëgnester animal. La lege baia ince di caji de arbandon y maza di tiers de ciasa, y prevëiga sanziuns penales por la maladoranza di tiers tl sport y ti pëncs.