La Usc di Ladins

Chësta jöbia domisdé incër les 14:40 él gnü a s’al dé n bur’ intervënt a La Ila, che á cherdé al apel l’Aiüt Alpinisć Alta Badia y le joler dl Aiüt Alpin. I socoridus é gnüs cherdá da jí sö cuntra Gardenacia, por na desgrazia che ti á costé la vita a n ël de 76 agn dl’Argentina. L’ël ê sön tru cun de sü familiars da gní jöpert por la sëmena nr. 11, canche ara é sozedüda. Sciöche le surastant dl Aiüt Alpinisć Fabian Oberbacher nes dij, é l’ël tomé sura sëmena jö y é brodoré jö por chi 250 metri. Canche i socoridus s’á alzé tl’aria cun le joler, ne savôn nia atira olá jí a chirí avisa, mo spo án defata ciafé le corp zënza vita dl ël, che ê amez le bosch. Al n’é sté plü nia da nen fá. Sce l’ël é gnü püre y é spo tomé jö, o sce al é ciumpedé o ci che al é ciamó sozedü, ne sciafion nia da dí. "Sü familiars ê n toch dessura y n’á nia odü", dij Fabian Oberbacher. Le corp zënza vita é gnü recuperé cun la binda y joré cina jö La Ila, da olache al é spo gnü condüt tla capela di morc a Corvara. Söl post él ince rové la Verda de Finanza, sciöche ince l’Assistënza Spirituala – che s’un á tut sura di familiars. Che l’ël palses tla pêsc.  (pablo)