La Usc di Ladins

En vëndres dl’ultima edema s’ál desfiré a La Ila la festa de Maria dal Ciüf y de feragost cun la defilada tradizionala y la festa tl zënter de paisc. Iniann á la defilada alzé fora dui iubileums nia da püch. Tröp á La Ila albü da festejé te chësc 2025: na bela gran festa ál bele dé ca por le centenar dl’Uniun di Stüdafüch de paisc, gnüda a s’al dé de jügn y inant jarára cun le iubileum di 40 agn dla Copa dl Monn tl mëis de dezëmber.

Nia d’ater n’ess porchël podü rové al zënter dla defilada, che á cherdé adalerch zacotan de spetadus. Chisc á amiré i grups, les musighes y i ciars infornis, che é spazirá fora por le zënter dl paisc.
I grups y i volontars di stödafüch de düc i paisc dl’Alta Badia y lapró ince da d’atri paisc de valada, s’á vistí sö cun le guant da inlaota, por porté sön plaza la storia dl’uniun y so svilup. Pian ia dala fondaziun, gnüda a s’al dé tl 1925, por jí inant ala refondaziun tl 1946. Y inant éra jüda tapa do tapa, y ciar do ciar, alzan fora i evënc plü signi­ficatifs.

Na posiziun de relief á ince ciafé l’evënt sportif dla gara dla Copa dl Monn, che festejará en chësc ann le iubileum de 40 agn. N tlap de sportifs dai schi é spazirá fora por le zënter, recordan la sajun da d’invern che n’é pordërt gnanca tan dalunc.


Liede deplü tla ediziun nöia da incö, vëndres ai 22 d'agost!