La Usc di Ladins

En domenia ai 28 de setember, n bel ciel brun da d’uton e n soreie amò ciaudin, à encornijà l pelegrinaje giubilar de la parochies de Fascia a Oies, su la pedies del sènt ladin Giosef Freinademetz.

N bel grop de fidei é rué via col pulman endrezà da la parochies, n muie de etres é rué te la Val Badia per so cont coi auti. Entorn les diesc da doman l é pontà via la procescion sul percors de la Via Crucis con dantfora don Andrea Malfatti, don Mario Bravin, i raprejentanc con i confalons de la parochies e de Sèn Freinademetz e sul troi l é stat dit su l rosar di misteres gloriousc da n liber de monsegnor Luigi Bressan che acà vèlch an ge à fat don a Fascia de na reliquia del Sènt ladin da Oies.

Don Andrea, che l à ofizià messa grana tel santuarie con la casula con su Sèn Freinademetz, à dit che chest pelegrinaje giubilar l era jà stat programà chest’aisciuda passèda ma, ades, en vea del gran mudament che à dedant Fascia, l ciapa amò più segnificat per ge domanèr al Sènt da Oies sie didament, per meter te sia mans la miscion per la Gejia te Fascia, en particolèr l à domanà de preèr che l deide don Mario, che l se enjigna a rejer duta la parochies de la val.

Dut l articol su La Usc stampèda de en vender ai 3 de otober del 2025  (LG/MCI)