La Usc di Ladins

Canche taca ite l temp del Avent se scomenza a pissèr pian pian al Nadèl e al mister de che che l é sozedù te chela net freida acà passa doi mile egn. Per se enjignèr a chesta festa te sie segnificat più religious l Cor Valfassa e I Bontemponi se à metù ensema per portèr dant n event fora de anter, fat de fegures, conties e cianties. L titol l é »Natale dietro le quinte« e l é stat portà dant la pruma outa en mercol ai 3 de dezember te gejia de Pera. »Te chest spetacol ve contaron i evenc del Nadal – à dit te sia prejentazion dantfora Giulia Donei – proprio con i personajes che stasc vindò le coltrine: l é dut fegure che per solit no se sent te la storia del Nadal.«
L spetacol del Cor Valfassa e de I Bontemponi vegn portà dant ence ai 27 de dezember da les 21:00 te gejia de Cianacei e ai 3 de jené semper da les 21:00 te gejia de Soraga.

Se pel lejer dut su La Usc nr 48 dai 12 de dezember, che se pel troèr ence te la boteighes de sfoes. Sul sit se per fèr l abonament al e-paper per aer azes vigni vender a dut l sfoi sul fonin, tablet o computer.


 (Monica Cigolla)