L’atraziun turistica dla Val Badia "s’la spazirëia" feter vigni ann da n record al ater, y insciö ésera ince stada dl 2025, olache les gnüdes y les sojornanzes á lascé registré danü n "all time high", por tó ca le jargon finanziar, tan co le valur plü alt cina sëgn. I un damané do les zifres tles döes cooperatives turistiches dl’Alta Badia y d’Al Plan/San Martin, che s’les á metüdes a desposiziun – de ci che i rengraziun. Sce ara vá da trá conclujiuns sön i totai, ne vára baldi nia plü da fá avisa le confrunt diret danter les nazionalités, ajache cun le 1. de messé él gnü mudé le sistem statistich por les üties da munt – che vëgn insciö cumpedades a pert y zënza desfarenzié danter nazionalités. Chës
sojornanzes mancia porchël ti totai, ci che sfalza lisiermënter le confrunt dantadöt te chi comuns olache al é plü üties sö alalt. Impó nes sál interessant da savëi ci "tendënzes nazionales" che i un albü. Y chëres nes dá n valgönes indicaziuns: che i marciá prinzipai cara, dantadöt i todësc, y che al vëgn docá marciá internazionai, olache al dá al edl dantadöt le gran plus di polacs y di americans.
Por ci che reverda les zifres en general, án albü tla Val Badia 3.442.484 pernotamënc, che é n aumënt dl 1,41% respet al ann denant. Chëstes zifres é gnüdes arjuntes cun i 719.892 ghesć che á passé chiló da nos sües vacanzes. I ghesć é chersciüs dl 1,79%, ci che ó dí che a livel de valada é la sojornanza mesana jüda zoruch de na frizia – ince sce nia te vigni comun: tl’alta valada ésera jüda zoruch, tla bassa söpert.
T’La Usc di Ladins di 20 de forá podëise lí do zifres y coriosités dl 2025 turistich, comun por comun. (pablo)
