La Usc di Ladins

»I jüc olimpics« te n spetacul
La jöbia ai 19 de forá mët a jí dötes les scores de schi dl’Alta Badia n spetacul dediché ai jüc olimpics, sön la pista »Doninz« a La Ila
Do le suzes dl apuntamënt de jená, tëgn dötes les scores de schi dl’Alta Badia, en jöbia ai 19 de forá dales 21:00, n spetacul sön i schi sön la pista »Doninz« tl zënter da La Ila. Le spetacul da en chësc iade é de­diché ai jüc olimpics. An podará odëi deplü disciplines sportives olimpiches sciöche schi, snowboard, jadiné, hockey, salt cun i schi, biathlon, bob, sciöche ince n valgönes plü de particolares che gnará presentades te na manira speziala. Sambëgn ne pó nia mancé le rait a val tradizional cun i chentli da pert di tröc maestri, y i jogn dl »Pirates Freestyle Team« mostrará sü salc y acrobazies tl’aria. N spetacul rich de adrenalina, che liëia düc i maestri de schi dl’Alta Badia.Düc é dër bel inviá da gní a ti ciaré al spetacul; an podará ince lité la disciplina che á plajü le plü.

Ciaval dala maza
Le Museum Ladin inviëia a n laboratore creatif da pastelné por mitans y mituns dai 6 agn insö acompagná dai geniturs
Vacanzes, tëmp lëde. Ëise vëia da pastelné? Adöm cun Teresa Vallazza Moling pastelnunse n ciaval dala maza. Cun nüsc bi ciavai podarunse dedô salté fora por la terassa dl museum. 
Che sará mo le plü asvelt? Hop hop hop, Mizi vá galop! L’atelier creatif sará en jöbia ai 19 de forá dales 9:00 ales 12:00. Dai 10 agn insö pó i mituns gní susc. Al vëgn tut sö al plü 20 partezipanc. Le prisc de partezipa­ziun é de 5,00€. Prenotaziuns por telefon al 0474 524020 o cun e-mail a prenotaziuns@museumladin.it

Multisport tratan l’isté 2026
Alta Badia: edemes de ativités y aventöra por mitans y mituns dala scolina cina ala mesana
Les sozietés sportives dl’Alta Badia mët a jí chësc isté tröpes ativités:
»Mini Multisport + Creativity«
Ativités por mitans y mituns dla sco­lina, cun nodé, ginastica, percursc de abilité, jüc de motorica. Edemes intieres dai 13 ai 17 de messé, dai 27 al 31 de messé, dai 10 ai 14 d’agost, dai 24 ai 28 d’agost, tres dales 9:00 ales 14:30. Le cost é de 120,00€ a ce (cun marëna). Iscriziuns dai 23 de forá al 1. de merz sot al link https://forms.gle/pDCdTe P21xszeu1p7
»Sportweek All Day«
Por mitans y mituns dla mesana: edemes de sport y aventöra cun ativités desvalies: arpizada, rafting, jüc de scuadra, parcour, jüc t’ega y. i. i. Edemes intieres dai 13 ai 18 de messé y dai 10 ai 15 d’agost, dales 9:00 ales 16:00. Le cost é de 120,00€ a edema (zënza marëna). Iscriziuns dai 23 de forá al 1. de merz sot a https://forms.gle/Qx DUUmdwV9jon1hB6
»Multisport All Day«
Ativités desvalies por mitans y mituns dla scora elementara: da roda a palé, da jadiné a nodé cina beachvolley y erts marziales. Edemes intieres dai 6 ai 10 de messé, dai 20 ai 24 de messé, dai 3 ai 7 d’agost y dai 17 ai 21 d’agost, dagnora dales 9:00 ales 15:00, cun la marëna lapró. Cost: 360,00€ a ce (cun marëna). Iscriziuns dai 23 de forá al 1. de merz sot a https://forms.gle/KW2 jvqE gR7BzrQd98
Informaziuns plü menüdes ciafon ala e–mail a info@skiteamaltabadia.it