La Usc di Ladins

Giancarlo Pederiva da Poza l é l nef Ispetor del Distret di Studafech de Fascia. Lo fèsc a saer la Federazion di Studafech del Trentin con n post sun sia piata Facebook. Sia nomina é stata fata ansera, jebia ai 8 de jené, dai comandanc e vizecomandanc che se à troà te caserma de Vac per litèr chi che aessa tout l post de Alessandro Pellegrin che, a la fin de sie mandat, à dit en ocajion de Sènta Bèrbola de no voler più se meter a la leta. Sia dezijion é stata touta do che l é vegnù a mencèr l sostegn da man de vèlch comandant.
La nomina de Giancarlo Pederiva é stata con nef stimes a favor e na zedola biencia sun diesc prejenc. Pederiva l é stat l soul che se à metù a la leta. L va endò a corir la encèria de ispetor che l aea jà tout su dal 2013 al 2020 canche l é stat lità president de la Federazion di Studafech del Trentin, ruol che l à abù fin del 2023.

De più su La Usc de papier de en vender ai 16 de jené

 (Monica Cigolla)