La Usc di Ladins

Aede problemes de osteoartrosi al jeneie? Volede proèr na terapia con bagnes de èga da solper tel zenter QC Terme de Poza per stèr miec? Bèsta aer na zertificazion de vosc medico che chest tratament podessa jir ben per voetres e ge domanèr a Claudio Merighi: da la fin del meis de mèrz pearà via na sperimentazion clinica con 84 persones che podarà aes azes al tratament zenza aer brea de paèr nia.
La sperimentazion vegn metuda a jir da Fassa Terme, olache apede al president Claudio Bernard l vizepresident Merighi se à semper cruzià de la pèrt che revèrda l'èga. L aon domanà fora en cont de chesta sperimentazion.

Scomenzon da l'èga. Se sà da tempes veiores che chela da solper de Poza à efec su la sanità...
Claudio Merighi Ei, Poza l'à na situazion idrogeologica n muie positiva, sion piens de aga e aon chesta crepa de bellerophon che à ite n muie de minerai, soraldut solper. Per chest la é cognosciuda desche stazion termala dal 1492 en ca.

Chi che vel vegnir touc ite te la sperimentazion, fin a ruar al numer pervedù de 84 persone, i cogn prum de dut rejonar con sie medico de familia (duc é jà stac informé) e canche i à l zertificat i pel se oujer a Claudio Merighi per mail a info@fassaterme.it o per telefon chiaman de lunesc o de mèrtesc da les nef da doman fin les 12 da mesdì l numer 346 6832350.

Podede lejer dut su La Usc dai 27 de firé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)




 (Lucia Gross)