La Usc di Ladins

30 ani Ensemble Gherdëina
Cunzert de iublieum n sada ai 28 de fauré te dlieja de S. Cristina
Metù su l ann 1996 sun scumenciadiva de Gebhard Piccolruaz, à l Ensemble Gherdëina da for incà abù l fin, de ti dé a ciantarines y ciantarins de Gherdëina la puscibltà de se dé ju cun mujiga mpue plu mpeniativa. Nscila iel cun l passé di ani unit a s’l dé pruiec n culaurazion cun dirighënc y urchestres renumedes da oradecà y che à purtà l cor nce sëura i cunfins dla Ladinia ora cun cunzerc tl’Austria, tla Talia y nce a Paris.
Per l iubileum nvieia l Ensemble Gherdëina a n cunzert, che spidlea l gran repertoire cun chël che l cor se à dat ju te duc chisc ani.
Dui cater dirighënc, che à menà l Ensemble–Claudio Kerschbaumer, Felicitas Schweizer, Samuel Runggaldier y Martin Runggaldier–à nsenià ite pec che va dal tëmp dl renascimënt nchin ala mujiga cuntemporana. Purtà dant uniràl danter l auter mujiga de Monteverdi, Mendelssohn, Bach, Stefan Demetz, Dubra y d’autri.
L cunzert ie chësta sada, ai 28 de fauré, dala 21.00 te dlieja de Santa Cristina. La ntreda ie debant.
N dumënia ai 1 de merz cianterà l Ensemble Gherdëina oradechël la Santa Mëssa dala 9.00 daduman a Urtijëi. L unirà purtà dant la »Kleine Orgelmesse« de Haydn.

Ewa Jönsson Hörtnagl – Bergwelten
Giaurida de na mostra nueva n vënderdi ai 6 de merz tl Tublà da Nives de Sëlva
La pitura de Ewa Jönsson Hörtnagl (*1950 a Helsingborg, Svezia) se mët ite te na tradizion storich-artistica de cartografia dla memoria y dl’esperienza vivuda, te n mond destinà a passé. »Bergwelten« reprejënta na secuënza de cuntredes, che auza ora l lëur dl giavé, dl jì sot a plu strac, dla crissa de un o de plu zëntri. L’artista lëura cun ntenzion ala bona y cun na udleda sciorfa. Si tecnica strat-sun-strat fej deventé l tëmp n valor cuncret. La cromatica suvënz da revin y da tiera sotrissea chësta carateristica, reprejentan l ciaut y la vita, ma ie nce sëni de n sté chiet, de n mudamënt o de n pruzes de descumposizion. A chësta maniera devënta la pitures testemunianzes dl tëmp che ne se lascia nia tenì su. Memoria y esperienza ne smarësc nia mé te si forma uriginela, ma se muda tla forma y tl carater. Nscila pòssen “liejer” la pitures te si rujeneda zënza paroles. Na poejia misteriëusa, che se damanda tëmp.
La giaurida ie n vënderdi, ai 6 de merz, dala 18.00 tl Tublà da Nives te Sëlva.
Ntroduzion: Peter Demetz y Martina Rier
La mostra resta 
davierta nchin Pasca, ai 5 d’auril, uni di ora dl lunesc dala 16.00 ala 19.00.


A pas de löm
Ai 3 de merz pón se gode na sëra sön i schi da paslunch pro le zënter de paslunch Alta Badia, che vëgn ilominé por l’ocajiun
Le zënter de paslunch Alta Badia pîta vigni de la poscibilité de se gode la natöra y le chit cun i schi da paslunch, tla localité Sciaré a San Ciascian. Deplü é i percursc che an pó fá y en chësc ann él gnü ponsé da tigní n anel davert ince da sëra, che vëgn ilominé te chësta ocajiun speziala.
Nia ma chentli y löms ilominará la pista, mo ince la löna colma i fajará da cornisc a chësta sëra particolara. La manifestaziun á inom »A pas de löm« y vëgn tignida le mertesc ai 3 de merz dales 19:00 ales 22:00. An pó se impresté fora l’atrezadöra da paslunch diretamënter pro l’imprëst dai schi, che é davert ince da sëra. Sön la terassa dl restorant »La Raisc« vëgnel dé fora val’ de cialt da bëre. Por tó pert ala sëra »A pas de löm« n’ól ester degöna prenotaziun.

Marlene Cup sun Dantercëpies
Na garejeda de slalom lerch per jëuni y jëunes l proscim fin dl’ena sun l purtoi »La Ria«
L Schi Club Gherdëina mët a jì n sada y dumënia ai 7 y 8 de merz, n slalom lerch FIS Jëuni sun l purtoi LA RIA per la categuries aspiranc y iunior, mutans y mutons.
L fajerà pea i miëur jëuni de Südtirol, ma nceatlec y atletes de plu nazions.
L vën pià via dala 9:15 daduman cun la prima manche. La premiazion ie ntëur ala 13:00, japé de Dantercëpies.
L Schi Club Gherdëina nvieia duc i apasciunei de schi a unì a ti cialé a chisc campions jëuni .
L nes fajëssa plajëi pudëi saludé nce Vo!

Curs de telemark a La Ila
La US La Ila mët a jí n curs por prinzipianc y progredis: 3 sëres de merz, sön la pista »Doninz« a La Ila
La Uniun Sport La Ila – seziun telemark, mët a jí n curs de telemark por prinzipianc y progredis. Tó pert po düc chi che á interes da vaghé les prömes otes te chësc sport. Le pröm iade vëgn le curs tigní en mercui ai 4 de merz dales 20:00 ales 22:00, sön la pista »Doninz« a La Ila. Le cost é de 70,00€ (20,00€ vá sciöche iscriziun al’Uniun Sport La Ila). Les iscriziuns vëgn tutes sö pro Arthur al 329 8627658 – ma tres WhatsApp.

Aperitif artistich a Badia
L’EPL mët a jí na iniziativa daverta a dötes y düc tl Studio Zona
En jöbia ai 12 de merz 2026 dales 18:30 inant sarál la poscibilité da tó pert a n aperitif creatif tl Studio Zona a Badia. Al sará n momënt por s’la gode, cun n gote y corusc tla man, y la lerch por esperimenté cun liberté. L’artista Gaia Lionello condüj les interessades y i interessá tla creaziun de süa opera. Al ne vëgn nia damané esperiënza, ma vëia da porvé fora de vigni sort por realisé na opera personala y se arichí de na esperiënza nöia. Le cost por tó pert é de 25,00 € (aperitif inclusif), les prenotaziuns vëgn tutes sö al numer +39 333 365 3636.

Strings in motion
L ensemble de archëc jëunn tenirà n cunzert n mierculdi ai 4 de merz dala ot da sëira tla Cësa di Cungresc de Urtijëi
Strings in Motion ie n ensemble de archëc nternaziunel jëunn y nce n pruiet de cunlaurazion danter l’Università de Mujiga Mozarteum de Salzburg, l conservatorium Tiroler Landeskonservatorium de Dispruch y l Istitut de Mujiga de Südtirol. L ie unì metù su dal pedagogh de archëc y sunadëur de vidula, Christos Kanettis l ann 2010. Cun l sustëni de Anita Mitterer lëurel ora i prugrams di cunzerc.
L se trata de n cunzert tres trëi dejeneies de storia de mujiga–da Felix Mendelssohn nchin a Nino Rota, cun doi soli da pert de doi jëuni de Gherdëina: n solo sona Katharina Larschneider cun l flaut pra n pez de Carl Philipp Bach, n auter solo de tuba sona Filip Senoner pra n pez de Arild Plau.

Iscrizions Scola de Mujiga
La Scola de Mujiga de Gherdëina fej al savëi che la iscrizions per l ann 2026/27 puderà unì fates online dai 1. nchin ai 31 de merz sun my.civis.bz.it
Coche uni ann puderàn crì ora danter de plu strumënc, cianté, muvimënt y bal. L’ëures de lezion che vën pitedes sibe te Sëlva che nce a Urtijëi ie: Educazion mujichela per mëndri de 5 ani; Cianté–Muvimënt–Rujené–1a y 2a tlasses dla elementera; Furmazion dla usc per jëunes, jëuni y granc da 12 ani insù.
I strumënc
Dai 6 ani insù: vidula, celo, zitra.
Dai 7 ani insù: armonica a butons, corn, flaut a bech, flaut traviers, tlarinet, tumbreta y flicorn.
Dai 8 ani insù: chitara, fagot, percuscions, posauna, corn tenor, saxofonn, tl a v i  r
Dai 9 ani insù: tuba, oboe.
A Urtijëi: »Sing & Swing«, per sculeies dla 3a, 4a y 5a tlas dla scola elementera;
»Sing your Song«, per sculeies dla trëi tlasses dla scola mesana;
»Lausbubenchor«, per mutons dala 3a tlas dla scola elementera nchin ala 1a tlas dla scola mesana.
Te Sëlva: COR »LA DERJOLA«, per sculeies dla 3a, 4a y 5a  tlas dla scola elementera y dla trëi tlasses dla scola mesana. 
Ai scric ite nueves ti uniràl fat al savëi al plu tert nchin ala fin de lugio sce i à giapà lerch. Per nfurmazions plu avisa: 0471 796858 o scrijan a musikschuldirektion.groeden@schule.suedtirol.itDuc ie de cuer nviei!