La Usc di Ladins

Ence chest an a Moena, per endrez de la responsabola de la Biblioteca de Comun Valentina Manica e de la vizeombolta e assessora a la cultura Cristina Donei l é stat endrezà la rassegna »Troes«, pissèda fora de sajon per ge dèr l met a la jent del post de cognoscer libres e autores de nosc teritorie e descorir leames anter comunanza e schertura. L terzo apuntament de chesta sajon é stat metù a jir adum col Parch Natural de Panevelge e l à abù desche protagonist Quinto Antonelli, responsabol del Archivie de la schertura populèra de la Fondazion Museo Storich del Trentin, che à rencurà l liber »Crescere in montagna dal XIX secolo alla contemporaneità«. Sie intervent é stat vidà da Walter Taufer del ofize stampa e comunicazion del Parch de Panevelge, l ent che del 2025 à dat fora chesta publicazion e che aea metù fora la mostra »Bambini di montagna. Storie d'infanzia con sguardi sul mondo 1870-1960-2024«.
La rassegna »Troes« jirà inant semper te Sala Rovisi del Comun de Moena en jebia ai 30 de oril da les 17:00 con letures dal terzo liber de Armando Vadagnini »Conversazioni di storia trentina. Da letterato a storico«, esperienzes dai egn '60 ai egn '80 travers i recorc del storich moenat.


Podede lejer dut su La Usc dai 24 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)

 (Lucia Gross)