La Usc di Ladins

L besegn de pruma cèsa e de n studie sul davegnir de la mobilità l é anter la prioritèdes del Comun General de Fascia. Lo à rebadì l procurador Edoardo Felicetti ence te l’ultima sentèda del Consei del Comun General de Fascia chiamèda ite en mèrtesc ai 28 de oril. »Aon dat fora doi deleghes neves – l à dit te sia comunicazions: Marco Pederiva se cruziarà de la revijion del Pian Stralcio de la mobilità de Fascia e Luigi Marchetti de la costion de la pruma ciasa. Per chel che varda la mobilità volassane dar su na enciaria a n tecnich per far n masterplan che mete dant la situazion de ades e chela del davegnir ence en previjion de la avertura del tunel del Prener.« Semper anter la comunicazions, su domana de la conseiera Mirella Florian de coche va inant l projet per la ex caserma de Sèn Jan, l procurador Felicetti à fat a saer che l iter é stat sospenù.
I prumes trei ponc al orden del dì revardèa la interogazion sul Zenter Traumatologich de Sèn Jan, la mozion su la proponetes de sostegn per i fic a lonch termin tel tegnir de Fascia e n’autra mozion su la sensibilisazion envers l’emportanza di sistemes de soravèrda tras video per l stravardament de la segureza te la scoles, dutes trei portèdes dant dal capogrop del grop de Consei Neva UAL Amedeo Valentini.
L é stat ence aproà l rendicont de gestion 2025 che moscia n arvanz de aministrazion de 7,7 milions de euro.

Podede lejer dut su La Usc dai 8 de mé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)

 (Monica Cigolla)