La Usc di Ladins

L era pien sala del Oratorie de Vich en martesc sera ai 23 de jugn. Sarà stat 140 persone, beleche dute de paisc, che à tout su l envit de la Coprativa de Fascia per rejonar del davegnir de la filiala de Vich. L era jit stroz la ciacola che i aessa volù la serar, ciacola sobito chietada via dal president Norbert Bernard e dal diretor David Pisoni che à dit bel chiar che »la volontà l é chela de mantegnir l presidie comerzial a Vich.« Ma co éla donca che l é stat chiamà ite i sentadins? »Aon volù chest moment de confront percheche la Coprativa la é di sozi e l é giust rejonar ensema per verjer n dialogh, per veder olache volon jir, per viventar l sens de responsabilità e de condivijion« à dit l president Bernard tel verjer la scontrada.
Dute le 5 filiale le é en perdita ma chela de Vich più che dute: - 60.000 euro del 2023-2024, - 80.623 euro del 2024-2025, demò l 25% di sozi va a proveder sa Vich (ti 8 meisc de sajon d’istà e d’invern se rua al 19% e fora de sajon al 44%).

»Le maor critiche che sention l é che canche se rua ite no l é mai nesciugn, che l é massa ciar, che no l é mai nia, che i fruc e i ortames i é de bassa calità – à dit Pisoni – sun dut chest sion do che luron per miorar ma no l é sorì e soraldut no podon l far da soi. Volon esser na bona azienda ma ence na bona coprativa ma fin a che livel negatif pelela ruar na azienda e na coprativa? Volon restar te paisc e l far miec che l é meso ma se cogn troar le soluzion miore.
No volon zeder – à amò dit Pisoni – percheche se serassane perdassane n valor e n presidie sozial, la Coprativa vel far soa part, e i sozi?«

Podede lejer dut l articol su La Usc stampèda dai 26 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)

 (Monica Cigolla)