La Usc di Ladins

Daniel Ploner da Pinëi a Al Plan nes fej incö na parüda n pü’ capazia, deache i l’incuntun por nes cunté de süa ultima esperiënza personala, chëra da avëi tut pert ativamënter por le pröm iade desco ciavalier al gran rait de Oswald von Wolkenstein tles contrades a pe dl Scilier/Schlern.
Al é passé püces edemes da chësta esperiënza, y sëgn che les fadies y emoziuns á podü n pü’ se calmé ia, cunta Daniel dla idea dan plü agn da tó pert a chësc rait y dla pröma gara che l’á odü danter i protagonisć.
En chësc ann é le rait gnü davagné dala scuadra Sarntal Nordheim, metüda adöm da Martin Thurner, Devid Aichner, Peter Gross y Hannes Jaider. Ai á passé ia les cater proes d'abilité tl tëmp de 4 ores y 46 menüc. Al 24. post él da ciafé le cuartet de Daniel Ploner, dal inom "Völs St.Konstantin"; adöm a Jakob Prossliner, Fabian Karabacher y Danny Tschager él rové cun le destach de 1 ora y 33 menüc do ai pröms. De 36 scuadres rovades al travert é chësc debut comemorabl, y al resta tla storia bele por le fat che n ciavalier de Mareo é sté ala pert y é tles classifiches finales.

Deplü sön le Rait y na intervista cun Daniel Ploner podëise lí t’La Usc di 26 de jügn, olache al baia de "Pel de iarina y emoziuns".

 (Iaco Rigo)