La Usc di Ladins

Les era de cater, e dut eles, la candidates che à tout pèrt al concors per l'encèria de Sorastant de la Scola Ladina de Fascia, che con chest uton cognarà tor su l temon dal professor Federico Corradini, che à ret la Scola de Fascia ti ultimes 5 egn. 
Angern jebia ai 18 de jugn se à dejout la doi proes a ousc, che ensema con i titoi met adum i ponc per la graduatoria. Aldò de chesta proes, la Comiscion con a cef l professor Paul Videsott ge à assegnà la valutazion maora a la professora Mattea Eccher.
La prof.a Eccher la é de naa ladina da man de père, cresciuda a Moena e dapò enciasèda forin Fiem. La rejona delvers ladin, l'à i atestac e l cors Antropolad e l'à dezidù de fèr te chest lengaz duta sia proes a ousc per l concors. L'aea ciapà la zertificazion per l ladin aministatif amò acà passa 20 egn, canche l'aea lurà per vèlch an te l'APT de Fascia. Da presciapech 18 egn la ensegna ingleis te la scola auta, desche dozenta la é stata beleche semper te Fascia ma l'à volù fèr vèlch esperienza ence fora per Fiem.   
Nos l'aon contatèda a Trent, olache la é chisc dis per i ejames de matura te la Comiscion del Liceo Rosmini e aon vedù che l'à jà vèlch idea per na neva encèria da dirigenta.
Endèna ampò per la nomina ofiziala de neva Sorastanta ge vel spetèr l iter pervedù da la lege su la Scola (L.P. nr 5 del 2006): l Sorastant vegn nominà da la Jonta provinzièla do aer sentù l parer del Comun General de Fascia.

Podarede lejer de più su La Usc stampèda de vender ai 26 de jugn.

 (Lucia Gross)