La Usc di Ladins

Dolomites Bike Day, 9. ediziun
En sabeda ai 20 de jügn ti vëgnel resservé ai ziclisć les strades di jus de Ciaulunch, Falzares y Valparola, en ocajiun dl Dolomites Bike Day
I jus de Ciaulunch, Falzares y Valparola sará i protagonisć dl Dolomites Bike Day, che gnará metü a jí en sabeda ai 20 de jügn. En chësc de vëgn les strades di trëi jus y i coliamënc anter i paisc de San Ciascian, La Ila, Corvara, Reba y la Pli de Fodom stlüc al trafich motorisé y resservá ai ziclisć, che pó se gode n de sön la roda en segurté. La roda é indöt 51 km lungia cun n deslivel de 1.370 m y an pó pié ia da ci paisc che an ó, cun ci sort de roda che an ó. Le strades gnará stlütes al trafich motorisé dales 9:00 ales 15:00. Al vëgn aconsié da fá la roda tl vers cuntra l’ora, tan co da Corvara devers de Reba. Düc chi che vá ion cun la roda é dër bel inviá da tó pert a chësta manifestaziun, olache an ne á nia bria da se scrí ite y che ne dess nia ester na gara. Deplü informaziuns sön www.dolomitesbikeday.it


Alta Badia Freestyle Team
Al é nasciü na seziun nöia tl Ski Team Alta Badia, dedicada a schi y snowboard
Le Ski Team Alta Badia, en colaboraziun cun le »Pirates Freestyle Team«, á metü en pe la seziun nöia »Alta Badia Freestyle Team«, dedicada a schi y snowboard, che s’oj a jogn y jonins nasciüs anter le 2008 y le 2015. De dezëmber 2026 vëgnel pité deplü cursc: chi dai schi s’alenëia le mercui dales 14:30 ales 16:30 y la sabeda dales 10:00 ales 12:00; por la brëia él le mercui y le vëndres dales 14:30 ales 16:30. Lapró él n’ora al’edema de alenamënt atletich/acrobatich y la poscibilité da tó pert ales gares dla FISI Südtirol Slopestyle Tour y döes gares promozionales. L’iscriziun costa 720,00€, cun laite la cherta FISI, an ciafa le schipas a n prisc alisiré. Nia lapró n’é l’iscriziun ales gares. Ai cursc él da se scrí ite anter i 16 d’agost, al link https://forms.gle/Z2FFVFEyGpvHX1SYA
Aladô dles adejiuns él la poscibilité de na sesciun d’altonn cun preparaziun atletica/acrobatica, ince tl Banger Park a Scharnitz tl’Austria. Informaziuns pro Thomas al 339 1433016 o Altin al 335 6105655.


La fundamëntes dla scunanza dla mendranzes
Christoph Perathoner prejënta si scrit nuef pra n cunvëni a Bulsan
»Grundlagen des völkerrechtlichen, europarechtlichen und verfassungsrechtlichen Minderheitenschutzes« ie la publicazion dl scrit de abilitazion nuef de Christoph Perathoner, te chëla che l vën fat na reprejentazion dla mendranzes linguistiches ladina y friulana tla Talia y n escurs sun la cumenanza linguistica retoromana tla Svizra.
La unirà prejenteda pra n cunvëni n con’ dla mendranzes, che sarà n lunesc ai 15 de juni dala 14:00 y 18:00 tla Università liedia de Bulsan, self c2.01. La prejentazion ufiziela dl scrit sarà dala 14:15.