La Usc di Ladins

Dolomites Music Festival a Moena
Cater dis de festa te tendon con l contest de la Bandes en moviment. En sabeda ai 4 de messèl gran conzert de la Bandes de la Magnifica Comunità
Dai 25 ai 28 de jugn la Musega de Moena, en colaborazion con l Comun, endreza l Dolo­mites Music Festival. Cater dis de festa te tendon ló dal ciamp de balon Benatti, con la cojines avertes dal mesdì e da sera, la gran defilèda de la Museghes ladines fora per paisc e l contest de la Bandes en moviment.
Chest l program:
Jebia 25, se averc
h. 18:00 tai de la veta e se averc la bot, ma­gnè­res tipics e musega con i Alpenschweine Musikanten
h: 20:30 musega con The Heimatdamisch

Vender 26, Sèn Vile
h. 8:30 beicher con la defilèda fora per paisc
h. 10:00 messa grana per ladin
h. 14:00 premiazion di atlec mondièi de Moena
h. 14:15 conzert de la Banda de Moena
h. 17:00 80 egn de fondazion de la Monti Pallidi
h. 18:15 premiazion de Sorì Event
h. 20:30 musega con Vollbluet

Sabeda 27, Musik in Bewegung
h. 12:00 conzert de la Banda folk de Folgaria
h. 13:30 festival de la musega en moviment
h. 15:45 musega con Mährische Dunajska Kapela
h. 20:30 musega con Die oberkrainer polka Mädels

Domenia 28, la valèdes ladines
h. 13:30 conzert de la Banda Val di Susa
h. 15:00 gran defilèda de bandes e gropes
h. 17:00 musega con i Königsberger Mu­sikanten
h. 21:00 musega con Die Rockjäger

Sabeda 4 de messèl, l Gran Conzert
h. 16:30 gran defilèda fora per paisc
h. 17:00 gran conzert e premiazion te Piaz de Ramon
h. 20:30 musega te tendon con Susal die Partyhexe


Vins alaleria
Cërcia de na seleziun di mius vins de Südtirol, amesa la natöra: sis apuntamënc fora por l’isté, le pröm ai 26 de jügn
Tl’Alta Badia vëgnel invié ia ince en chësc isté la scomenciadia »Vins alaleria«. Al vëgn metü a jí indöt 6 apuntamënc danter jügn y setëmber, olach’an gnará pro da ciarcé na seleziun di mius vins de Südtirol. N sommelier spligará les saus di vins, deperpo ch’an podará se gode la bela contrada da munt incëria. Vigni cërcia se roda incër na tematica ia, sciöche por ejëmpl vins blanc o cöci, vins spumanc o vins biologics y biodinamics. 
Por tó pert ala scomenciadia mësson se scrí ite ti ofizi turistics dl’Alta Badia o online, olache an pó ince ciafé le program cun dötes les informaziuns. La pröma cërcia vëgn tignida ai 26 de jügn dales 14:30, pro les cascades de Pisciadú a Calfosch. I atri apuntamënc é preodüs ai 15 de messé ala Capanna Alpina a San Ciascian, ai 29 de messé tl parch di tiers a Calfosch, ai 12 d’agost al Sas Dlacia, ai 28 d’agost dlungia le Lech dla Lé a Badia y ai 9 de setëmber sura Biëi a La Val. Vins alaleria vëgn metü a jí da Alta Badia Brand, deboriada cun le Consorz di vins de Südtirol y la Uniun di Sommeliers de Südtirol.


La operes de Lois Rottonara - ROTT a Vich
Dai 27 de jugn ai 25 de messèl te tobià de Val a Vich la bela esposizion del artist ladin
L’Union di Ladins de Fascia aur na lingia de mostres de artisć ladins te n nef spazie espositif, l veie tobià de legn del president Fernando Brunel via Val a Vich. Prum apun­tament ai 27 de jugn co l’inaudazion de la mostra Liëndes ladines dles Dolomites del artist badiot Lois Rottonara – ROTT da La Ila, che restarà averta enscin ai 25 de messèl duc i dis da les cater a les set domesdì. ROTT l é n artist cognosciù a livel internazionèl, te chesta bela esposizion sarà da poder veder vèlch una de sia operes più beles metudes fora te n tobià che à conservà amò duta la carateristiches da n’outa.
La inaudazion é en sabeda ai 27 de jugn da les cinch domesdì, la sarà vidèda da la prof.ra d’èrt Lorenza Florian e endeletèda dal compagnament musical de Susy Rottonara.
La perferida artistica de chest istà jirà inant dai 8 ai 23 de aost co la esposizion de la operes de Fernando Brunel.


missing glaciers – missing me
L Tublà da Nives nvieia de cuer ala mostra dla artista Wil-ma Kammerer. La giaurida ie n vënderdi ai 26 de juni dala 20:00 tl Tublà da Nives te Sëlva
Dlacieres ie archifs dl tëmp. Ëi custedësc mileneies de tlima, muvimënt y lecorc. L’artista de Puster Wil-ma Kammerer tematiseia l sfanté di dlacieres coche fenomenn ecologich, ma nce persunel y emoziunel.
Ntan che i sfanta, ne scumparësc nia mé la dlacia – nce na pert de nosta relazion cun la cuntreda, cun la storia y cun nëus nstësc vën melsegura.
Tapec sluminënc y n muvimënt, plates de scipa che stramuda y spiedli che nes mostra la cuscienza de nosta respunsabltà te chësc pruzes de trasfurmazion. La ntroduzion ie de Heinrich Schwazer. La mostra resterà davierta nchin ai 26 de lugio.