La Usc di Ladins

Se à serà su con na gran festa en vender sera ai 24 de messèl te piaz de Sotegrava a Moena e na gran partida en sabeda ai 25 sul ciamp de balon Benatti l ritiro de la squadra del Genoa che te la terza partida da peconc l à parejà 2 a 2 contra l Vicenza.

La squadra del Grifon é stata ai fresc te Fascia dai 16 ai 26 de messèl. »N ritiro dalbon n muie pien, l prum per me, cercenà da scì tenc de sostegnidores« à dit mister Daniele De Rossi tedant a doimile jent te Sotegrava che lo à festejà tel dì che l compia 43 egn.

»L é stat dut positif – ne à dit l diretor general de Fascia Gregn Evenc Cristoforo Debertol – la squadra é stata contenta del ciamp, del hotel, de l’ospitalità. No aon amò i dac de la prejenzes ma chest an ne à sapù più jent che i egn passé, l aon vedù stroz te paisc e ence ai arcedamenc sul ciamp. La partides é jites delvers ence se l é semper chi 20/30 ultras feruscoi che fèsc mingol de biteboi. Sul davegnir cognon amò se rejonèr con l’ApT e Trentin Marketing e fèr mingol de valutazions. La sozietà la fossa contenta de vegnir endodanef ma l arcedador Rossi à dit che l volessa n ritiro dalonc da la jent, zenza aer semper zachei che scouta che che l disc. Se sà ben che i arcedadores i muda ence se nos cognaron capir bele prest co se mever per l an che vegn, soraldut per aer la desponibilità del hotel.
No saassane dir se zenza l Genoa fossa autra jent che empienesc i posć let, la soula roba che podassane proèr a fèr per capir l é stèr n an zenza squadra. Aboncont l é ence dut n descors de comunicazion che śira dintorn a n ritiro, fin a la fin de mé nosc marchie resta fora sul ciamp del Genoa, sui led e te la sala stampa, l à n valor ence chest. De setember aron l prum Consei de Aministrazion e ge é jà domanà che vegne metù desche pont al orden del dì l ritiro del Genoa per fèr la valutazions che serf« à dit Debertol.

De più su La Usc stampèda de en vender ai 31 de messèl del 2026  (Monica Cigolla)