La Usc di Ladins

L é Mauro Bonvecchio l nef president del Comitat Trentin de la Fisi (Federazion Talièna Sport da d’invern). L é stat lità en vender ai 24 de messèl te la sala Rusconi de palaz Coni de Trent con 4.575 stimes, l 61,17%, e l à passà via coscita l’autra candidata Raffaella Podetti che l’à ciapà 2.571 stimes, l 34,38%. Bonvecchio tol l post de Tiziano Mellarini che lascia l temon do doi mandac a cef de la Federazion trentina. Giornalist, co-titolèr de na agenzia giornalistica, per 30 egn l é stat responsabol de la comunicazion e relazions esternes de la Federsci provinzièla, semper en pruma linea te la comunicazion di Jeghes Olimpics de Torin 2006 e Milan-Cortina 2026. L é cognosciù te Fascia ajache l à corì ence l’encèria de responsabol del ofize stampa de duta la garejèdes de Copa del Mond de schi alpin e skicross te noscia val, i Mondièi Junior del 2019, la Universiadi del 2013 e n muie de etres evenc sportives.

En raprejentanza di atlec l l é stat lità l fascian Thomas Bonelli del FassActive e Bruno Debertolis, no l é ruà ite Werner Krause.

»Voi ge sporjer n fort develpai a duc i schi club che à tout pèrt en gran numer a chesta litazion – à dit content Mauro Bonvecchio – a testimonianza de la viveza del moviment di sport da d’invern che dombra passa 8000 tesseré e 89 schi club che laora sul teritorie te la 12 disciplines che vegn fat tel Trentin. La doi endesfides maores che me mete dant l é l dialogh con la scoles per didèr i atlec-studenc ence col tor ite consulenc da fora che cognosc l mond de la scola e jir inant col confront con la sozietèdes de impianc portamont per garantir i portoes de arcedament te duc i raions dai schi del Trentin magari ence col ge dedichèr percorsc de gara aldò. Atenzion da man de Bonvecchio ence al istitut scolastich de noscia val che conjobia scola e sport. »Recorde che te Fascia aon ativa na convenzion col Ski College, l é de besegn de lurèr per ge dèr maor valorisazion.«  (MCI)