La Usc di Ladins

La setemèna passèda te Comun de Sèn l é ruà critiches e lamentanzes da man di utenc ciolé ite tel resservar de Soal ajache col temporèl de enstadì l’èga é endò doventèda moron. L Comun à cognù manèr fora na ordenanza che oblighèa a la boir. La fontèna de Soal é pecg fona e bèsta che se meve via l teren che va ite sobito lim e giarel. E do che Vaia se à portà demez l bosch no l é più reijes che tegn e donca l é sorì che la pievia fae l rest. De chesta costion aon rejonà con l ombolt Giulio Florian.

Co éla che no se troa na soluzion per chest problem che sauta fora a ogne temporèl d’istà? 

Giulio Florian Oramai jà da n bon pec de egn sion do che fajon studies su la intensità de la giara che va ite canche l é temporai, sul torbol de l’aga e ence sui carichi e scarichi, che vel dir su l’aga che va fora e sun chela che assane de besegn. Donca sion do che ge studion do da canche aon ciapà te man la situazion. La soula soluzion l é meter filtres patricolares che à de gregn cosć.

E endèna, fin che no vegn metù i filtres?

La fontana de Soal l é la soula che ne crea problemes ma l é la soula ence che ne dasc na bona cantità de aga, 50 litri al secondo, che ne permet de no restar zenza aga. Chel che aon proà a far l é balanzar duc i bosserlaic e donca proar a destacar chi che é taché te la linea de Soal per veder se sion bogn de star, te chest moment d’istà che le fontane le à più aga, zenza chel’aga aló. Per Poza someassa che la vae ajache i à ence l’aga che rua dal bosselait de Garneté, per Vich enveze che no i n à de autra, cognon lurar col ‘massa pien’ de Freina-Soal, che l é n’autra fontana che serf te chest moment Pera e Moncion, la é neta percheche la vegn fora da sot n sas, e proar a ge manar a Vich chela che va per sora, ma aon vedù che no i n aessa assà. La soula roba che podon far te chest moment l é garantir duta l’aga del ‘massa pien’ de Freina-Soal e la mescedar con l’aga de Soal per responer a dut l besegn de Vich.

Duta l'intervista su La Usc stampèda de en vender ai 31 de messèl del 2026. 




 (Monica Cigolla)