La Usc di Ladins

Te sia radunanza generèla de en vender ai 24 de messèl Dolomiti Superski à renovà la encèries del Consei de Aministrazion per i trei egn che vegn. Andy Varallo l é stat confermà president per l terz mandat e apede el desche vizepresident l é stat lità Daniele Dezulian, president de la SITC, che tol l post de Zeno Kastlunger. Confermé ence Siegfried Pichler (per Fiem-Obereggen), Zeno Kastlunger (Plan de Corones), Andreas Schenk (Gherdena-Sousc) e Sandro Lazzari (stat president) desche comembres efetives. Al post de Marco Zardini (Ampez) rua ite Sergio Prà (Civetta) en raprejentanza di comprenjories del Venet. I revijores di conts l é Giuseppe Zorzi e Valeria Ghezzi (confermé) e l nef Walter Holzer.

Te sia relazion de fin mandat l president Varallo à fat l bilanz de trei egn segné da na gran evoluzion per l setor di impianc portamont de la Dolomites, caraterisé da doi momenc simbolics: l 50° cedean del Consorzie del 2025 e l ruol zentrèl endèna i Jeghes Olimpics da d’invern Milan-Cortina 2026.
»Inovazion, colaborazion, investiments a do a do e sostegnibilità per portèr Dolomiti Superski fort tel davegnir« à dit l president Andy Varallo.

Dut l articol su La Usc stampèda de en vender ai 31 de messèl del 2026  (MCI)