La Usc di Ladins

L à inom »Lux Aeterna« l program che Ilario Defrancesco del Gide da Moena à enjignà per chest istà. Do »Alfa e Omega«, »Il Cantico della natura«, »Fra cieli e terre« e »Suoni sospesi« di egn passé, ence chest an l Maester ge à metù dant na neva endesfida a si ciantores. I zirca 40 componenc del Ensemble, anter chisc n bon pec de joegn, no i à demò cognù emparèr 15 cianties te na dejina de lengac desferenc, ma ence doventèr ejempies vivenc per na picola lezion che l maester Defrancesco à enterzà ite per anter i toc, cernui no a cajo ma apontin per didèr a entener miec i stii desferenc, esemplifichèr en curt e a na vida lijiera conzec de la musega desche la tonica e la dominante e uzèr fora l efet del modo minor o maor e de l'esecuzion a più oujes.

N gran compliment a duc i ciantores e un amò maor a sie Maester: con chest conzert i à dalbon enlumenà la Pieif, che per dimenjion e acustica é zis adatèda per valorisèr chesta sort de esibizions.

Descheche à recordà l president del Ensemble Domenico Ciresa, rengrazian a la fin del conzert la Parochia e don Mario, l Comitat manifestazions e duc i sponsor, 'Lux Aeterna' vegn portà dant amò doman, lunesc ai 3 de aost fora Ciavaleis te la Pieif, ai 10 te la gejia de Ciastel de Fiem per fenir en beleza ai 17 de aost te la gejia de Sèn Vile a Moena.

Dut l articol su La Usc stampèda de en vender ai 31 de messèl del 2026  (Lucia Gross)