La Usc di Ladins

En sabeda ai 24 de messèl l é stat l ultim dì de la mostra de la operes de ROTT te Tobià de Val a Vich. Na mostra che é restèda averta per n meis alalongia e che à abù n bon suzes de media e de jent, e che soraldut l’à dat l met de ge fèr cognoscer ence ai fascegn e ai ghesć l’èrt de n artist de nonzech internazionèl desche Lois Rottonara.

Ampò, la rassegna sui artisć fascegn no se ferma chiò: se jirà inant dai 8 ai 23 de aost con Imprescions, mostra personèla de Fernando Brunel, President de la Union e patron del Tobià de Val. 
La selezion de chèdres ne porta a descorir la enrescida artistica de Brunel che spieia sie esser desche persona: n fon e strent leam con sia tera ladina, sia jent, sia cultura e sia tradizions. I sogec l é la natura de noscia valèdes, i tobié da mont, la majons veiores de sasc e legn, l Carnascèr fascian, i lurieres da n’outa empersonifiché da jent che el à cognosciù.
Imprescions ne conta de n artist che depenc no demò chel che l veit, ma soraldut chel che l recognosc desche pèrt de sia istoria e de sia identità.
La inaudazion sarà en sabeda ai 8 de aost da les 17.00 e la sarà endeletèda da la performance musicala de Sabina Willeit (ousc) e Giorgio Fasciolo (piano).
La mostra restarà averta duc i dis enscin ai 23 de aost da les 16.00 a les 19.00.