La Usc di Ladins

Tl Comun de Mareo se prejenteia doi candidac per l scagn da prum zitadin: l Ombolt da sen Albert Palfrader d’Al Plan y Felix Ploner da La Pli de Mareo. Palfrader candideia sun la lista "Al Plan", Ploner é a cef dla lista "Paîsc d’La Pli"; laprò saràl ciamò la lista "Rina" y la novité dla lista sourafrazionala "Düc Adöm".
Trei listes él ence tl comun de San Martin de Tor – dutes listes de paisc: la lista "Ciastel" da San Martin, la lista "Lungiarü" y la lista "Antermëia". Per l scagn da ombolt candideia demé l Ombolt atual Giorgio Costabiei. Un n candidat a ombolt y una na lista él tl Comun de La Val, olà che Angel Miribung se enjigna per n auter mandat. El sarà a cef dla lista de paisc "La Val". Na lita combatuda pòn s’aspeté tl Comun de Badia, olà che al é chesta outa endut cater listes y trei candidac a ombolt. L Ombolt atual Iaco Frenademetz candideia a cef dla lista "Badia - La Ila - San Ciascian". Concorenza giàtel da la lista "Manfred Canins Ombolt, Badia - La Ila - San Ciascian", che se prejenteia con Manfred Canins sciche capolista y candidat a ombolt. Laprò él ciamò la "Lista Zivica por düc – per tutti – für alle" che à sciche candidat a ombolt Christian Pedevilla. Laprò él na cuarta lista, "Deburiada", che n’à metù su degun candidat a ombolt.
Tl Comun de Corvara él una na lista soula, la lista "SVP Calfosch Pescosta Corvara", che arà sciche candidat a ombolt l prum zitadin atual Robert Rottonara.