La Usc di Ladins

Dai 24 ai 27 de oril l é stat l pelegrinaje di joenec per l Giubileo. N pelegrinaje deldut particolèr, programà te dis segné da n event storich, la mort e l ultim salut al Papa. Centmile joenec da dut l mond é rué a Roma, 1200 demò da la Diozesa de Trent, compagné dal Piscop Lauro Tisi, da don Mattia Vanzo, joen preve da Moena delegà de la Diozesa per la Pastorala di joegn e da na chindejina de preves del Trentin, anter chisc don Andrea Malfatti. Na ventina zirca l era ence i joenec de seconda e terza mesèna peé via da Fascia, da Soraga en ite, compagné da Lucia, Carmen, Patrizia, Federica e Vigilio che é jic ensema con n grop da Fiem e etres da Moena compagné da Lorenzo e Matteo, jic con n auter grop trentin.
Canche la catechistes ge à domanà a zachei se i fossa vegnui amò chel dì te noscia redazion a ne contèr l'esperienza che i à vivù, no i se à fat preèr. De set i é rué a Sèn Jan en lunesc domesdì, duc engaissé.
»Se i ve dijessa de partir endodanef doman bonora per jir a Roma e far amò na esperienza coscita, jissade?« ge à domanà na catechista. »Fosc proprio doman bonora no – à responet na beza con n grignot – ma domesdì podassane ge pissar.«

Se pel lejer dut su La Usc nr 16 dai 2 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.

 (Lucia Gross)