La Usc di Ladins

En lönesc ai 12 de setëmber á Paul Sorarú cumplí 80 agn y sambëgn ne podô la Müjiga La Ila nia mancé, en chësc gran de por festejé so presidënt d’onur. Bele la domënia sëra se á l’uniun dla Müjiga abiné adöm por ti soné n valgönes melodies a Paul, cun na picera defilada cina sot ciasa. Do avëi soné val’ toch é i musicontri gnüs inviá a sté en compagnia y passé n pü’ de tëmp cun Paul y ti fá na viva por le gran travert arjunt. Paul á dagnora albü na gran pasciun y le cör davert por l’uniun dla Müjiga da La Ila: ai 10 de jená dl 1985 s’á incunté siur Franz Sottara (ploan da La Ila), Robert Comploj (dl Casteller), Albert Crazzolara ( Berto), Paola Crazzolara (maestra), Rudi Granruaz (Rudi d’Arlara), Robert Pizzinini (da Picenin), Franz Rottonara (Franzl de garasc), Paul Sorarù (de Susas dla Brida), Amadio Valentini (Somaila) y Sepl Valentini (dl Moro) tla ostaria “La Bercia” por fá pié ia na scomenciadia nöia te paisc: mëte sö na musiga a La Ila. L’idea é gnüda tuta sö cun gran scerieté y les parores é tosc gnüdes realté.

Paul s’â tut sura da jí a chirí adöm musicontri cun l’aiüt di atri. Insciö êl bele tosc dedô zacotan de mituns y jogn che porvâ da imparé da conësce les notes y da soné le fabló y la teoria te n local sot calonia ite. Paul Sorarú é salté da piz a ciantun a s’impresté de vedli stromënc dales atres musighes dla valada, sciöche clarinec, posaunes, trombëtes, percusciuns y d’atri. La Müjiga da La Ila é piada ia cun 31 musicontri jogn danter i 8 y i 18 agn, ater co dui o trëi che ê plü vedli. Le plü vedl â 39 agn y le plü jonn 8.

La Müjiga é gnüda reconesciüda ai 7 de jená dl 1986 dal “Verband Südtiroler Musikkapellen” sciöche “Müjiga La Ila”, y fej pert dl raiun da Bornech. Paul Sorarú é sté presidënt dl’uniun Müjiga La Ila dal 1986 cina le 1998. Dedo él romagnü inant mëmber atif dl’uniun sciöche portabandira y amesa ite él ince ciamó sté tl consëi. A gauja de problems de sanité ne á Paul nia pü podü marcé adöm cun la musiga, mo impó êl presënt a vigni manifestaziun cun gran ligrëza. Por döt ci che al á fat y ofrí sö por l’uniun á Paul ciafé dl 2018 l’onoranza de “Presidënt d’onur” dla Müjiga La Ila. Dagnora á la Müjiga La Ila podü se lascé sön Paul y sön süa man sterscia che á daidé da tigní adöm l’uniun y é sté por düc i mëmbri de gran ispiraziun. Cun gran respet y reconescënza él le consëi, cun so presidënt atual David Bernardi, adüm cun düta l’uniun che aoda de cör düt le bun a Paul por le complí di 80 agn.  (Sabrina Gasser por la Müjiga da La Ila)