La Usc di Ladins

Le borjú dla sostenibilité. Le numer de porsones che ó fá na vacanza sostenibla crësc tres deplü. De conseguënza é ince nasciüdes n gröm de mersces de sostenibilité turistica: al n’é passa 150 sura döt le monn. Valch é serioses, d’atres manco, ciamó d’atres ma n marcé. La merscia de sostenibilité GSTC (Global Soustainable Tourism Council) – che Al Plan/San Martin á arjunt dan dui agn y l’Alta Badia l’ann passé, vëgn aratada ince da critics pro chëres plü serioses. Cheriada sön impuls dles Naziuns Unides y controlada da organs esterns, ciara la merscia a livel global y valutëia la sostenibilité ambientala, mo ince economica, soziala y cultu­ rala. Impó ne mancel nia les critiches te nüsc paisc: co pón pa zertifiché localités olache le trafich vá porsura? O strotöres che scialda d’invern nodadoies alaleria? Él indô döt ma marketing? O stöp vërt ti edli?

Daldöt nia, dij Carlo Runggaldier – diretur dla Cooperativa Turistica (CT) Al Plan/San Martin. Al Plan á ospité l’ann passé de jügn la secunda ediziun dl convëgn »Sustainable Tourism Forum« cun la partezipaziun dl aministradú deleghé dla GSTC mondiala Randy Durband; Runggaldier é spo jü amez dezëmber al convëgn mondial dla GSTC a Sevilla tla Spagna, olache al á podü presenté la destina­ ziun dan da rapresentanc de 61 naziuns. Do süa minunga sunse te nüsc raiuns bele tröp sostenibli, ince sce al ne mancia nia les critizités; mo i sun ince raiuns che vir de turism, ci che se damana da jí ite compromisc. Porchël dijel: »zënza sostenibilité economica, n’él gnanca chëra ambientala, soziala y culturala.«

La intervista cun le diretur podëise lí t’La Usc di Ladins di 3 de forá  (Intervista: Pablo Palfrader)