La Usc di Ladins

Al ê l’ann 1982 che al é gnü complí la pröma traversada internazionala dles Alpes cun i schi d’alpinism. Bëgn 384 partezipanc s’â metü sön tru ai 20 de merz da Nizza y da Trieste demez, por s’incunté spo sön le San Gotardo ai 23 de ma, do 114 tapes, duimile chilometri y 150 mile metri de deslivel. Al é sté chësc avenimënt che ti á dé vita ala incuntada internazionala di schialpinisć, che vëgn tignida ann por ann. Cun na ediziun o l’atra che é tomada fora te chisc cater dejenars, éson iniann rová ala 39ejima ediziun. Y chësta é rodunt gnüda ospitada tla Val Badia, plü avisa a Lungiarü. Dai 5 ai 11 de merz s’á abiné tl paisc dl alpinist incër 70 porsones de lies da munt internazionales. Dlungia partezipanc dl AVS – Alpenverein Südtirol, n’êl ince dl CAI – Club Alpino Italiano, dl ÖAV – Österreichischer Alpenverein, DAV – Deutscher Alpenverein y SAC – Schweizer Alpenclub. Al apel falâl en chësc iade ma la Francia y la Slovenia.  (pablo)