La Usc di Ladins

Al n’é chiló incërch nia plü tröpes dlijies olache al é da odëi la Fossa Santa. Tla Val Badia n’él indere dër na bela – chëra te dlijia da Calfosch, che an podará indô aprijé dai 25 de merz inant, cina en Sabeda Santa ai 8 d’aurí. Le sepolcher é gnü lascé fá dl 1837 sön inciaria de R.S.G. Domenico Degillia y Filippo Tavella. Bele tl’eté medievala án metü man da mëte sö tles dlijies sepolcri sciöche imitaziun dl Sepolcher Sant de Ierúsalem. An orô insciö onoré le tëmp dla velia. Chi püc che â podü fá n pelegrinaje tla Tera Santa orô daidé i fedei da s’imaginé sciöche le Sepolcher de Gejú ciarâ fora. Tl’eté medievala alta é spo le sepolcher deventé l’ultima staziun dla Via Crucis. Tl sepolcher da Calfosch pón ince odëi ot chedri dl calvare de Gejú: 1) Gejú tol comié da süa uma; 2) Gejú sön la Munt dl Orí y l’angel cun le caresc dla soferënza; 3) Gejú vëgn flagelé; 4) Gejú vëgn incoroné de spines; 5) Gejú toma sot la crusc, daidé dal Cireneo; 6) Gejú mör söla crusc, cun Maria y Jan sot la crusc; 7) Gejú palsa tl sepolcher cun dui soldas che verda; 8) Maria adolorada cun la soferënza de Gejú tl cör. La jënt che tëgn sön le tëmp sterch dla Carsëma é inviada da storje pro te dlijia da Calfosch, por passé y perié ti momënc chîc dan la Fossa Santa, adincuntra ala gran festa de Pasca.