La Usc di Ladins

La domënia ai 26 de merz él gnü a s’al dé a Balsan le "De dles Patrones", che á cherdé alerch chës 600 patrones da döt Südtirol. Cotanc i punc importanc al ordin dl de: danter chisc ince la onoranza ala "Patrona dl ann", che é gnüda litada Karin Kofler Frei da Völlan. Onoranzes ti án spo surandé a 5 patrones che é adora romagnüdes vëdues y che á impó trat inant le lüch, cun gran bries, fadies y fistidi. Danter chëstes patrones él ince Consolata Nagler vëd. Rungger dl lüch dl Feur a Lungiarü. Consolata â maridé Gerolamo Rungger, mo é baldi bele romagnüda vëdua dl 1997. Ara á insciö messü jí inant sora, ciaran ince di dui mituns che la familia â albü.
Cun Consolata Nagler, él ince gnü onoré Maria Luise Egger vëd. Malpaga da Nals, Hildegard Weithaler vëd. Nischler da Naturns, Marianne Rabensteiner vëd. Senn da Villanders y Margit Schmid vëd. Huber da Elvas.  (pablo)