Por festejé i 150 agn á le »Vinzentiner Knabenchor« tigní deplü conzerc. Un de chisc é garaté en domënia tla dlijia da San Linert, a Badia
La Val Badia é da dagnora liada al Vinzentinum, che complësc iniann 150 agn. Chësc lian é gnü ciamó plü strënt dal 2014, da canche Andrea Tasser, nasciü y chersciü sö a Badia, é le dirighënt dl »Vinzentiner Knabenchor«. Chësc cor á te süa storia albü tröc dirighënc y ince presidënc ladins. Y propi ince por via de chësc lian an chirí fora Badia, plü avisa la dlijia de San Linert, por tigní un di trëi conzerc iubilars. Le pröm conzert é sté le vëndres sëra tl Vinzetinum y spo n'él ciamó sté un le mertesc, tl »Castaneum« a Feldthurns. Le cor cumpëda aldedaincö 60 mëmbri, danter mituns, cun les usc ciamó plü fines y morjeles, y jogn, che á bele rot la usc. Chëstes usc s'á moscedé y á rondení en domënia
sëra tla dlijia da San Linert, olache al é rové adalech n gröm de jënt apascionada de musiga a d'ascuté sö. I mituns y i jogn dl »Knabenchor« é gnüs acompagná dal ensemble a archëc »Sound of Strings« dla scora de musiga da Tlüses, cun la dirighënta Sylvia Lanz. Les cianties y les melodies se á desfiré por n'ora alalungia, zënza na palsa danterite. Al é gnü porté dant toc ciantá dal cor adöm cun les melodies di archëc, toc soná dal ensemble y tesć fora dla Bibia rezitá dai ciantarins. I conzerc, che é garatá tratan la Carsëma, porta le titul »Ein Lied von der Grösse des Herrn«, y incünda la festa da Pasca che é oramai dan porta. Le repertore che an á podü ascuté sö tol ite toc sciöche »Ubi Caristas« fora dl Taizé, »Ave verum« de Karl Jenkins, »Jesus bleibet meine Freude« de Johann Sebastian Bach y »Verleih uns Freieden« de Felix Mendelssohn. I ciantarins á ince cianté cianties por inglesc, sciöche »The Lored Bless you and keep you« de John Rutter y n toch plü modern, »All the People said amen«, de Matt Mather. Cun »Oh munts y vals ladines«, na ciantia ladina, se á stlüt jö le conzert, cun chël che i ciantarins, i musizisć, les musizistes y dantadöt le dirighënt Andrea Tasser á arjunt so travert, che é chël da ti scinché ligrëza ala jënt cun la musiga. Chësta gran ligrëza an podü odëi, tl sorí sön le müs dl publicum te dlijia, y an á ince podü la aldí, tl gran y lunch aplaus por le »Knabenchor«, desmostraziun che le conzert é dër gnü aprijé.
(kp)
