La Usc di Ladins

Tla nöt danter sabeda y domënia dl’ultima fin dl’edema é n ël de 36 agn de nazionalité taliana, rové sot a n iat dala nëi ai pisc dla pista cöcena Altin. Le fat é sozedü incër les döes da doman canche le iat, che trasportâ i ghesć danter le paisc y le Piz La Ila, é salté tl schiadú. Le iat n’é nia sté bun da arforé jö denanche le ghest rovass sot ala bëna dl iat ite.

Ciamó denanche ciafé na ciaugnada dai cioi dl iat él sté meso da archité la mascin, dé l’alarm y dé le pröm socurs al ferí. Le scior gnô derevers da na cëna sön na ütia dl Piz La Ila, canche al é gnü abiné dal iat ai pisc dla pista sön la trata danter l’implant La Rüa y chël dl Piz La Ila. Sön le post é rová i socoridus dla Crusc Blancia, le dotur de pröm intervant y i carbiniers da La Ila y Corvara. Sciöche l’inzidënt sides avisa gnü a s’al dé, n’é nia ciamó tler.

Ciamó ti éra jüda bun al ghest, che é gnü trasporté d’emergënza tl ospedal da Balsan, olache al ti é gnü ciafé sö ferides pesoces al üf y ales iames.