La Usc di Ladins

Ai 12 de ma á l’ofize stampa dla Provinzia mené fora n comunicat dal titul "Incuntada por garantí les ciases di pici tla Val Badia", olache al vëgn informé de na reuniun stada püc dis denant. A Balsan él rové adöm l’assessuria provinziala ales families Rosmarie Pamer, l’assessur ladin Daniel Alfreider, rapresentanc di comuns dla Val Badia, la responsabla dla cooperativa "Casa Bimbo" (che manajëia les strotöres tla valada) Stefania Badalotti, i direturs de departimënt Michela Morandini por families y sozial y André Comploi por scora y cultura ladina, la direturia dl’Ajentöra por la familia Carmen Plaseller y le diretur di Sorvisc soziai dla Val de Puster Patrick Psenner. Le nojel dla sentada: la ciarestia de personal mët en dificolté les ciases di pici y mët al prigo le sorvisc instës. "Sce döta chësta jënt cadriëia a Balsan, mëssel ester na cossa seriosa", m’ái ponsé. Da inrescí do plü avisa pón le dí: la chestiun n’é nia da tó ala lisiria.
Tles ciases di pici vëgnel socodí i mëndri da 0 a 3 agn. Al é n sorvisc che é por tröpes families na nezescité, no ma na opziun – mëss pö i geniturs gonot intrami lauré y nia vigni genitur ne n’á lâs o neni che ti ciara di mëndri. Ti ultims agn án fat tla valada n gröm de sforc por daurí strotöres te vigni comun, y sëgn éson tla situaziun che an manacia da messëi nen stlü. La pröma che mëss la crëie é la Ciasa di Pici a Calfosch, che gnará stlüta cun la fin de jügn. Y sce la situaziun ne vëgn nia miú, messarán nen stlü ciamó d’atres. La incuntada a Balsan é stada le pröm vare por evité chësc "desaster" tl acompagnamënt di mëndri. Sce ara gniss davëi da les stlü, podesson propi adoré chësta parora, ponsan a ci gran laur che al é gnü fat por les arjigné.

Nos un baié cun deplü perts, por capí olache le cialzá drüca y ciünes che é les propostes de soluziun. T’La Usc di Ladins di 23 de ma podëise lí deplü.





 (pablo)