La Usc di Ladins

Chiara, co te prejentásseto a chi che no te cugnësc?
Mi son la Chiara Dorigo, è vintidoi agn. Son fia de la Ro­sanna e del Dino »del Moro« e è na sorela plu grana che à inom Linda; son nasciuda e chersciuda sa La Court, na picola frazion ntel Comun da Fodom. Mia fa­meia, l’é na fameia de bacagn, spo sci, pos l dì, »son na bacana«. Son na persona che ie plesc se mëte n śuoch e che à gusto a mparé tres ceze de nuof.

Contene n frëgo de ulache t’es juda a scola e de ulache t’as laoré…
Elementera e mesana i è fate nta Fodom, come duc; le scole aute, nveze, i è fate a Falcade, ntel Isti­tut Alberghiero, ulache m’è diplomé ntel indiriz »Sala e ven­dita«. Dai sëdesc agn nsù, nte le sajon da d’isté, è tres fat la ca­meriera; nveze, per ci che auda l inviern, è proé desferenc laour: è nolegé schi, è venù schi­pass pro i lifc e, da chësta ultima sajon, son ruada a laoré nte stala. (Ntervista de Denni Dorigo per la redazion de Souramont)