La Usc di Ladins

Le proiet de barat danter les döes scores ó sostigní la incuntada danter mendranzes de lingaz. Al dess ti porté pormez ai jogn y ales jones le plurilinguism, le dialogh y l’ester daverc y davertes sura i confins geografics y linguistics fora. 

A contat cun la realté di Grijuns 
I jogn y les jones dles secundes y terzes classes dl Lizeum dles Sciënzes umanes y dl Lizeum linguistich, sciöche ince dla terza classa dl Istitut Tecnich Economich á podü tó pert a n program desvalí. N elemënt zentral é sté n laboratore tla "Scola chantunala grischuna", olache al é gnü lauré fora n toch teatral te dui lingac. Lapró êl söl program escurjiuns culturales, sciöche la vijita tl Kloster St. Johann tl Müstair, na roda dla cité de Coira y na odlada iadô les culisses dala Radiotelevisiun Svizra Rumantscha (RTR).

Formaziun sura i confins fora 
Le proiet é gnü organisé dal Ciamp pedagogich dla Direziun provinziala Scolines y scores ladines cun le coordinamënt de Magdalena Lerchegger y cun le sostëgn ai contignüs da pert dla professuria Magdalena Miribung (Scores Altes) y dl professur Corsin Caglia (Scola chantunala grischuna).
"Chësc proiet ne renforzëia nia ma la competënza linguistica y la cosciënza dla identité culturala, mo dá ince n contribut da se daurí ala pluralité, ala toleranza y da sté adöm tl respet", sotrissëia le vizepresidënt dla Provinzia autonoma da Balsan y Assessur por la Scora y Cultura ladina Daniel Alfreider. "Avisa le barat danter mendranzes linguistiches desmostra tan de importanza che al é n plurinlinguism ví tl’Europa, sciöche al vëgn lauré por la promoziun de na comprenjiun danter realtés desvalies y sciöche al pó gní porté inant deboriada na identité europeica." (Ciamp pedagogich)

Deplü sön le iade podëise lí t’La Usc di Ladins di 16 de ma. Tla ediziun di 23 de ma podarëise spo lí impresciuns di studënc instësc.