La Usc di Ladins

La scora elementara da La Val mët dagnora a jí proiec dla digitalisaziun y chësc ann unse lauré cun i odlá 3D. Tl zënter dles leziuns él sté la realté virtuala. Chiló messunse nes damané ci poscibilités che al vëgn lapró te scora, mo ince le pinsier critich é dër important. I odlá 3D vëgn adorá individualmënter dai scolars y ai pó ti ciaré al monn atramënter co ma sön na fotografia. I scolars pó ti ciaré al monn da n ater punt de odüda. Les imajes dla realté virtuala vá sigü dër bun por materies sciöche la geografia, storia o sciënza. Lauran cun i odlá 3D él les emoziuns che á na gran importanza, i scolars se recorda plü saurí i argomënc tratá. I "3D-Viewer" te scora é afasciná da chësta poscibilité, mo i se recodun che l’imaginaziun y la fantasia dess dagnora fá pert dl monn dl scolar.

Chësta é ma öna dles ativités che é gnüdes fates a La Val, tla cornisc dl proiet de sperimentaziun. Cotantes deplü nen mostra sö Rudi Moling, t’La Usc di Ladins di 6 de jügn.