La Usc di Ladins

Le concurs ê basé sön n conzet pedagogich tler, definí tres n prozes partezipatif che á tut ite dirigënc de scora, insegnanc, studënc y families, cun l’acompagnamënt profescional dla professuria Beate Weyland, esperta de pedagogia y dles lercs por l’educaziun, y dl architët Luca Canali, referënt tecnich.
L’iniziativa é le resultat dla bona colauraziun danter le Comun de Badia sciöche portadú dl proiet y la Provinzia Autonoma de Balsan, che á la competënza por les scores altes y les scores de musiga. Chësta sinergia istituzionala rapresentëia n vare important dl vers dla realisaziun dl zënter scolastich nü a La Ila, por cherié ambiënc scolastics inovatifs, inclusifs y orientá al dagní. 
Le percurs de seleziun di proiec é gnü partí ite te döes fases. Impröma él gnü fat na valutaziun di sböc dá jö dai stüdi interessá. Al é spo gnü cherdé ite i esponënc di stüdi a na incuntada, olache la iuria ti á dé a vigni partezipant val’ indicaziuns implü sön co svilupé inant y mioré i proiec da dé jö por la fasa finala de seleziun. 
Ala fin dl prozes de valutaziun él gnü chirí fora le proiet dl stüde "delueg architekten" da Sterzing coche davagnadú.

Deplü sön la presentaziun di proiec y n valgügn renderings dl proiet che á davagné, podëise ciafé t’La Usc di Ladins di 20 de jügn