La Usc di Ladins

I mëmbri dl’Uniun Teater La Ila é rová chësc altonn sön palch cun n toch plü lunch y intravaié. »Döta colpa de Mona Lisa« é le titul dl toch todësch de Carl Max Haas »Schuld an allem ist die Mona Lisa«, traslaté tl ladin dala regista Erika Castlunger, che á ince curé la regia, acompagnan le grup tres i ultims dui mëisc de proes. Cun la premiera, garatada en vëndres ai 31 d’otober, á le grup dé löm vërda al’edema teatrala, invian ite a deplü rapresenta­ziuns. 

En ater ann festejará l’uniun le iubilé de 60 agn d’ativité, n travert che se mirita da gní alzé fora. Forsc ince chësta ocajiun á sburlé le grup a chirí fora na rapresentaziun valgamia plü lungia co chëres di ultims agn. Chësta edema é zacotan de spetadus bele rová adalerch por ne se lascé nia sciampé l’ocajiun da descurí ci che al é döt sozedü tl ciastel dl grof Pizzinini y sciöche chësc é pordërt rové pro na bela »Mona Lisa«.

Le proscim apuntamënt é chël de vëndres ai 7, y dedô chël de sabeda ai 8 de novëmber, dales 20:30. L’ultima rapresentaziun se desfirará domënia ai 9 dales 17:00, tres tl salf dles manifestaziuns dla Ciasa de Cultura La Ila.


Deplü podëise lí tla ediziun nöia de vëndres, ai 7 de novëmber!