La Usc di Ladins

»Da n valgönes edemes incá sënton danter i zitadins y les zitadines dla Val Badia n malcontënt che crësc tres deplü y che röia feter te na picera desperaziun«. Insciö scomëncia la tuta de posiziun de Elide Mussner, co–surastanta di Vërc y aconsiadëssa dl Comun de Badia, publicada ai 19 de dezëmber sön la plata internet dl partí. 
Tl comentar vá l’aconsiadëssa ite sön na tematica de chëra che an alda sëgn plü gonot. Le Ciastel Colz, la Gran Ciasa da La Ila, é comparida chësc altonn sön la plata internet de venüda imobiliara »Sotheby’s – International Realty«. Deplü é les speculaziuns che vëgn fates sön le prisc, nia dé dant sön la plata, mo che resta na »tratativa resservada«. 
Chësta noela á scassé sö valgamia la comunité, che se sënt de perde cun chësta venüda n monumënt de gran valüta storich–culturala, porim­plü sot a sconanza monumentala.

La chestiun é ince gnüda portada dant tl’ultima incuntada danter aministradus dl Comun de Badia y popolaziun. Le dejider che ti ê gnü porté dant ai aministradus ê de fá val’ por che le ciastel ne röies nia te mans forestes. La sconanza di monumënc ne straverda chisc nia da rové söl marcé imobiliar manajé dai privac, mo limitëia les poscibilités de mudaziuns ala strotöra da pert di proprietars y prevëiga le dërt de prelaziun por l’aministraziun publica sciöche le Comun o la Provinzia, propi ciodiche de te frabicac é ince d’interes publich, por süa valüta storica, culturala y artistica.

Mo co éra pa canche le prisc é oramai tan alt, che por les aministraziuns locales devëntel imposcibl da tigní bot al marcé? Deplü é les conscidraziuns che mëss gní fates.


Liede inant tla ediziun nöia da indoman, mercui ai 24 de dezëmber!