La Usc di Ladins

Le sport diletantistich en general y insciö ince chël dl palé, stá gonot ma en pe por mirit di cënc de porsones che mët a desposiziun so tëmp gonot debann, por manajé les assoziaziuns, por fá inant che al vëgnes adaldé y mantigní les strotöres, por acompagné gragn y pici ai apuntamënc sportifs y tan d’atri sorvisc. Te Südtirol y ince tla Val Badia nen savunse tröp de chësc vers. Por ci che reverda le sport dl palé, él la FIGC – la Federaziun Taliana dl Jüch dl Palé, y la LND – la Lia Nazionala Diletanc, che onorëia ann por ann assoziaziuns y porsones por miric particolars, sön proposta di comités regionai y te nosc caje chi dles provinzies autonomes. Insciö ésera stada ince en sabeda dan otedé, olache al é sté tl Hotel Hilton Rome Airport a Roma/Fiumicino la "Cerimonia di Premiazione delle Benemerenze". Te chësta ocajiun él gnü surandé bëgn 253 onoranzes a porsones y sozietés sportives da söinsom cina jödapé dl stifl talian. Te nosta valada á ciafé la onoranza Renato Paratscha da Antermëia por sü 40 agn de ativité tles assoziaziuns dl palé, sciöche ince le ASC Mareo, che á ince bele 50 agn d’ativité sön sües sciables.

Deplü ves dijunse t’La Usc di Ladins di 6 de merz  (pablo)