La Usc di Ladins

Valgamia na spordüda él sté por i ostis dl "Hotel Melodia del Bosco" a Badia l’ultima edema, tla nöt dl mercui ai 29 d’aurí, canche devers dles trëi da doman él pié ia l’alarm de segurëza dla strotöra. Chësc á ince sprigoré en malora i dui malfaturs che á rot ite tla strotöra y á arobé fora de cassa. I ostis n’á nia sciafié da i abiné sön le fat, porimpó á les telecameres tigní sö i dui leri en aziun. Tla registraziun él da odëi sciöche les döes figöres, cun müsa curida y cun capuza, deura sö la porta d’entrada prinzipala y spazirëia ite te hotel se fajon löm cun na patrî.
"Dales telecameres vëigon avisa che ai é jüs diretamënter te ofize, olache ai á ciamó n iade daurí sö la porta y é jüs pro les lades olache al vëgn tigní sö la cassa. Da sciöche ai se möi te strotöra podesson miné che al é valgügn che á nu", dij l’ostí Klaus Irsara. Ince sce al é püch: ci che ai á ciafé te cassa s’ái tut para. Canche al é pié ia l’alarm ái taié debota la corda, sciampan fora dal’entrada olache ai é rová ite.
"Ara é ciamó jüda bun, ciodiche al n’é nia gnü a s’al dé n gran dann. Porimpó romagnel la spordüda, ince sce al n’é nia da se lascé tó dala tëma", cunta l’ostí.
Al é plü co 20 agn ca, da canche al é gnü rot ite l’ultim iade tla strotöra. I ostis s’aoda che ara se trates de n fat isolé y che i leri ne ais nia fat vijita a d’atres strotöres, che é, sciöche an sá, gonot ötes fora de sajun. Intant é le fat gnü dé dant, tla speranza che al ne nen vëgnes nia ciamó d’atri lapró. (mo)