La Usc di Ladins

Tl »Studio Zona« a Badia él pié ia en jöbia ai 13 de merz la scomenciadia »Aperitif Artistich«, n program che inviëia a deplü apuntamënc cun artisć y a sperimenté tecniches desfa­rëntes. Cun la daurida ofiziala dl salf creatif tl raiun artejanal a Badia ai 31 de jená 2026 y la pröma mostra coletiva rovada a piz ai 15 de forá, á l’EPL­-Ert por i ladins lascé pié ia sëgn de merz i labors creatifs. L’»Aperitif Artistich« é na sort de labor creatif, che se desfaranziëia impó valgamia da n curs sciöche an le conësc. Ara ne se trata nia da jí do a regoles dades dant, mo plütosc da lascé caidlé ispiraziun, sperimenté cosses nöies y da lascé rogore idees y pinsiers. Chësc gareta dantadöt sce al é ciamó val’ de bun da bocolé y da bëre. Le momënt dl sté en compagnia röia adöm a chël artistich. L’inom le dij: ara se trata de n »Aperitif Artistich«; n aperitif n iade n pü’ atramënter. 

I apuntamënc dla scomenciadia jará inant döt l’ann cun n’incuntada al mëis, olache al sará poscibl da sperimenté tecniches desfarëntes cun tres d’atri artisć. En jöbia dan otedé s’ál tigní la sëra da depënje cun corusc acrilics, y tl proscim mëis ti tóchera ai corusc a ega. Deplü informaziuns ciafon sön la plata instagram dl’EPL.