La Usc di Ladins

L’ann passé de merz êl indô garaté – do na palsa de 20 agn – n campionat provinzial de orghi da man, metü en pe dal ex campiun dl monn di orghi Alexander Pamer. Do la bona esperiënza fata pro chësta pröma "re–ediziun", é la manifestaziun gnüda desfirada ince chësc ann tla fin dl’edema passada a Pfelders. Tut pert á indöt 55 partezipantes y partezipanc da Südtirol, Austria y ince Slovenia, olache al é sté al apel ince deplü sonadus ladins – düc aliefs dl maester Eduard Huber da Peraforada.
Le pröm post tla "Meisterklasse" é gnü arjunt da Pire Ellecosta da La Pli, che é rové sö a 97,62 punc y á ciafé la nota "hervorragend" – straordinar. Bele l’ann passé â Pire "soflé sön la devënta", stlujon jö al 2. post. En chësc ann ti l’ál fata da rové söinsom le podest. Söle scalin plü alt cun le resultat "straordinar" é ince rové Benno Sorá da San Martin, che á arjunt le 1. post tla categoria B, cun 97,25 punc.

Düc i atri resultac ladins – danter chisc na devënta injomada por n sofl – podëise lí t’La Usc di Ladins di 27 de merz  (pablo)